Thursday, February 9, 2012

خريج vs طالب جامعي

من كام يوم روحت الكلية اطلع شوية ورق .. و أول ما وصلت دهاليز الكلية، افتكرت الأيام اللي قضتها في الكلية ديه، و رجعلي فلاش باك عن كل الذكريات من ساعة لما دخلت الكلية لحد ما اتخرجت منها، اللي الحمد الله تقدروا تقولوا أيام عدت بسلام.
و افتكرت كل المفاراقات اللي حصلتلي و أنا في الكلية، و أيام ما كنا بنزوغ أنا و أصحابي لما المحاضرة تبقي فكسانة و كنا يا إما نلعب بنج بونج أو نروح ناكل، ما هو احنا كنا اكل و مرعي و قلة صنعة، يا اما ساعات كنا بنروح سينما.

و اتقلبت المواجع عليا لما افتكرت حب الكلية، و كل مكان وقفنا فيه مع بعض و إيه كان بيحصل بنا، و الخناقات اللي في التييمز وقت المشارييع، و مكاتب الدكاترة و المعيديين. الخلاصة بردو عشان أكون امين مع نفسى و معاكم .. كانت فيها أيام حلوة و أيام وحشة، اكيد طبعا اتعلمت حاجات كتيير، غير اني اتعلمت إن التعليم الجامعي بايظ زيو زي اى نظام تعليمي في مصر و الحمد الله، و اننا كنا بنضور علي محاضرات علي الانترنت عشان نفهم اللي بيتقال في الكتب و اللي الدكتور أو المعيد معرفش يقوله، بس ارجع و اقول كان في دكاتره و معيديين زي العسل، بس للأسف معظمهم دلوقتي مشي من الكلية و مستوي التعليم فيها و الطلبة بقي في النازل.

افتكرت كمان مكتب شئون الطلبة .. أو اي مكتب اداري في الكلية تعوز منه تطلع ورقة لنفسك أو حتي عشان اشتراك المترو. كنت تروح تقف عندهم في الشباك .. مكنتش تطلب اي حاجة غير لما يزعئوا فيك .. و انت معملتش حاجة .. بس اعتقد ان ده لسبب يرجع ان انت لسه طالب عندهم .. ملوش اى علاقة أو يمت بأي صلة بحالتهم المزاجية او المودية. أنا فاكر أول يوم ليا في الكلية .. روحت ادفع المصاريف زييي زي اي طالب .. روحت طلعت إيصال الدفع، و اتوجهت ناحية الخزنة و انا كلي فرح و سعادة اني رايح ادفع المصاريف عشان اقدر اطلع كارنيه الكلية و حركات المستجديين ديه. وقفت اخدت دوري لحد لما وصلت للشباك، اعده عليه مدام موقرة جدا، سألتها المصاريف كام قالتلي "200 و اربعين قرش" .. و أنا طالب غالبان مستجد، و كان من سوء حظي كل اللي معايا من الفكة 10 جنيه. فاطلعت من جيبي الفلوس .. و تكرمت و ادتهالها و انا بقولها معلش أنا أسف معيش فكة .. هي سمعت ديه و راحت زعقت بصوتها المسرسع قالتلي اتصرف انا ماليش دعوة .. روحت غبت و رجعت ب5 جنيه، قالتلي ﻷ بردو .. فضلت ادور علي فكة في الكلية كلها - ملحوظة أنا كنت جامعة حلوان، و كليتي كانت عند اخر الجامعة، كلية الحاسبات و المعلومات - ملقتش، اخدتني رجليا لحد لما وصلت المجمع التجاري أو ال "mall" بتاع الجامعة .. المهم بعد كل ده ملقاتش فكة عشان ام الاربعين قرش، و قررت ساعتها اني اروح البيت، و اجي ادفع المصارييف تاني يوم بسبب ال40 قرش دوول، و طوول سنيين الكلية عندي عقدة من المدام اللي قاعدة في الخزنة .. اتعوت اني في كل مرة اروح ادفع فيها حاجة عندها .. اروح افك 5 جنيه عشرات و خمسات ساغ ﻷن كل المصاريف اى كان نوعها فيها كسر قروش .. و كنت اقف عند الشباك احوت ايدي في جيبي و اكبش و اطلع سرة من الدنانيير، عملتلي عقدة من ساعتها .. الله يسامحها بقي!!

كل ده عشان اقول اني لما روحت الكلية من كام يوم .. بصفتي خريج بعد طول غياب عن الكلية 5 سنيين. اتعاملت في اليوم ده معاملة خمس نجوم ولا الكليات الخاصة .. لدرجة اني مكنتش مصدق نفسي اني واقف في نفس دهاليز الكلية اللي كنت واقف فيها و انا طالب. ساعدوني بكل طاقتهم بصراحة، و ادوني كل التوجيه و الإرشاد و كمان منكتش مصدق نفسي انهم اخدوا مني البطاقة عشان يصوروهالي عشان مكنش معايا صورة ليها!!!

مش عارف هما اتغيروا كده ليه .. هل ده بسبب انهم اتغيروا بجد و حقيقي و إن في شيء اتغير بعد الثورة وبقي في نظام جديد و احترام الانسان مهما كانت صفته ولا ده عشان انا بس بقيت خريج من الكلية!!

بس في النهاية احب اشكرهم جدا علي كل المساعدة و لهم كل الشكر و التقدير، انهم بسبب احترامهم و توجهم للمكاتب اللي هاستخرج منها الاوراق، خلصت الموضوع كله في مفيش تقريبا. بجد شكرا و شكرا للتغيير!!